FFTL prepara modalidade futeból ho másimu ba Sea Games

DESPORTU, HEADLINE

Sekretáriu Jerál FFTL, José Adilson Ribeiro. Imajen dok TATOLI

DILI, 28 Agostu 2025 (TATOLI)—Federasaun Futeból Timor-Leste (FFTL) hahú halo preparasaun ba jogadór selesaun nasionál antes partisipa iha kompetisaun desportu Sea Games iha Thailándia.

Sekretáriu Jerál FFTL, José Adilson Ribeiro komenta federasaun sei halo preparasaun másima hanesan treinu nary garante ekipa forte tanba maioria jogadór hafoin fila husi kompetisaun AFC U-23 qualifiers husi Xina, sei kontinua kedas halo preparasaun ba Sea Games.

“Ita nafatin tau alvu ba Sea games, nune’e ita kontinua halo preparasaun ba ekipa iha modalidade futeból,” Sekretáriu Jerál FFTL hateten iha ninia kna’ar fatin, Sede FFTL, Bairros dos Grilos, Kinta ne’e.

Notísia relevante: FFTL deside treinadór lokál na’in-haat provizoriamente lidera Selesaun Nasionál U-23

Adilson informa FFTL sei halo koordenasaun ho Komité Olímpiku Nasionál Timor-Leste (CONTL-sigla portugeza) nary Konfederasaun Desportu Timor-Leste (CDTL-sigla portugeza) kona-ba tékniku sira ligadu ho preparasaun iha modalidade futeból nune’e masimiza liután kontijente Timor-Leste iha Sea Games.

Nune’e, FFTL identifika maioria jogadór sira-ne’ebé sei partisipa iha Sea Game’s mak U-23, iha-ne’ebé sei mistura ho U-17 nary U-21 tanba bazeia ba kritéria jogadór ne’ebé prenxe rekizitu tenke ho idade U-22.

Entretantu, Sea Games ba dala-33 tinan 2025 sei hala’o iha Thailándia husi loron-03 to’o 20 Dezembru, iha-ne’ebé tuir planu Timor-Leste sei partisipa ho modalidade desportu hamutuk 13 hanesan Atletizmu, Karate-do, Taekwondo, Boxe, Futeból nary seluk tan.

Jornalista: Natalino Belo 

Editór: Xisto Freitas da Piedade