Kazu otél Oé-Upun, arguidu na’in-neen kontinua detein iha sela detensaun kalan ida

OEKUSI, 28 Agostu 2025 (TATOLI) – Arguidu na’in-neen ne’ebé suspeitadu prátika jogu online ilegál ba esplorasaun jogu ilisita kriminoza, nary burla informátika, redi scam telephone center transnasionál, ne’ebé instala husi empreza internasionál Seagull Resort husi Malázia iha otél Oé-Upun, kontinua detein iha sela detensaun durante kalan ida iha sela komandu PNTL Rejiaun Administrativa Espesiál Oé-kusi Ambeno (RAEOA).

Tanba iha prosesu julgamentu primeiru interrogatótiu, ne’ebé hala’o ohin, iha Tribunál Primeiru Instánsia Oekusi, seidauk iha rezultadu.

Tanba ne’e, Advogadu Privadu Octavio Cardoso, konsidera desizaun la bazeia kódigu penál Timor-Leste nian, tanba molok aprezenta arguidu sira iha tribunál, Ministériu Públiku ho Polísia Siéntifika Investigasaun Kriminál (PSIK), tenke asegura arguidu sira iha sela detensaun durante oras 72.

“Laiha buat ida, normalmente iha lapsu balun, atu deklara katak, durante ne’e, sira (arguidu) asegura de’it iha sira-nia rezidénsia, labele hetan liberdade atu sai husi fatin ne’e, to’o lori de’it mai iha prosesu primeiru interrogatóriu, durante ne’e sira la mai iha sela detensaun, agora lori ba sela detensaun, mekanizmu seluk ne’ebé mak uza, ha’u lahatene, maibé loloos ne’e iha inísiu kedas atu aprezenta ema mai iha tribunál tenke tau iha sela detensaun, ho razaun referida,” lamenta husi Advogadu Privadu Octavio Cardoso, ba jornalista sira iha tribunál Oekusi, lorokraik ne’e.

“Ida-ne’e mak arguidu sira kumpre sela detensaun durante kalan ida de’it, tuir loloos oras 72 molok aprezenta mai iha tribunál, maibé prontu ne’e maneira husi Ministériu Públiku ho PSIK nian, maibé serake ida-ne’e tuir kodegu prosesu normál, ne’ebé mak durante ne’e la’o kala’e,” nia énfaze.

Notísia relevante:PSIK aprezenta ona detidu na’in-neen iha tribunál Oekusi ba primeiru interrogatóriu

Kona-ba prosesu primeiru interrogatóriu, ne’ebé inísiu ohin, hahú iha parte dadersan nary kontinua fali iha parte lorokraik, seidauk iha rezultadu finál, nune’e tribunál deside adia ba aban sesta-feira, 29 Agostu 2025 tuku 15:00 lorokraik.

“Iha prosesu primeiru interrogatóriu ohin ne’e, ami tenke iha obrigasaun atu asegura segredu justisa, ha’u seidauk hateten katak, arguidu sira-ne’ebé aprezenta mai ne’e sai hanesan maksalak, maibé iha indisu, nia iha direitu prezunsaun inosente ne’ebé mak lei asegura, tan ne’e ko’alia kona-ba rezultadu ba iha médida koasaun iha andamentu ne’ebé mak la’o ohin, ita só bele hatene depoisde aban despaxu tribunál nian, ne’ebé ohin seidauk iha desizaun ka despaxu medida koasaun,” Octavio Cardoso ba jornalista sira iha tribunál Oekusi, ohin.

Entretantu, audiénsia julgamentu ne’e, prezide husi husi Juís Administradór Judisiáriu Primeira Instánsia Oekusi, Evangelino Belo, Ministériu Públiku reprezenta husi Prokuradór Mateus Nessi nary Jose Elo.

Detidu na’in-neen hetan asisténsia legál husi defeza husi Advogadu Privadu João Ndun nary Octavio Cardoso, inklui Defensór Públiku Estaqui Guterres.

Notísia relevante:PSIK ho SNI buska apreensaun nary desmantela jogu online ilegál iha Oekusi

Jornalista: Abílio Elo Nini

Editór: Rafael Ximenes de A. Belo