“Dezenvolvimentu ne’e la’ós TL atu adere ba ASEAN maibe alvu ba povu”

INTERNASIONÁL

Ministru Obra Públika (MOP), Samuel Marçal. Imajen Tatoli/Francisco Sony

DILI, 27 Agostu 2025 (TATOLI)–Ministru Obra Públiku (MOP), Samuel Marçal, hateten dezenvolvimentu ne’ebé la’o liuliu infrastrutura hanesan loke estrada iha Dili laran nary munisípiu la’ós de’it prepara ba Timor-Leste nia adezaun ba ASEAN nu’udar membru plenu iha fulan-Outubru mai ne’e, maibé nia alvu ba-liu povu. 

Notísia Relevante: “Dokumentu TL adere ba ASEAN ne’e, ami submete ona ba MNEK”

“Ha’u agora halo servisu mak estrada, bee, ahi, ida-ne’e parte ida preparasaun Timor-Leste nian ba adezaun ba membru plenu ASEAN, maibé ita halo servisu hotu ne’e la’ós ita atu tama ba ASEAN, servisu hotu ne’e ita halo alvu maka’as ba povu,” Samuel hateten ba Agência TATOLI iha Palásiu Governu, kuarta ne’e.

Nia dehan, povu nia nesesidade mós importante tebes iha nasaun ne’e oinsá atu asesu ba estrada ne’ebé di’ak, bee-moos ba ema hotu nary eletrisidade ba ema hotu.

“Ita preparadu, saida mak ita halo, halo tuir kbiit Governu nian. Maibé atu dehan katak, se ita adere MOP la hanoin atu kompete, maibé oinsá haree ba infrastrutura sira tenke la’o ho di’ak, hadi’a estrada-aat sira,” nia dehan.

Antes ne’e, iha 29 Maiu liuba, Governu liuhusi reuniaun Konsellu Ministru, aprova projetu Rezolusaun Governu, ne’ebé aprezenta husi Vise-Ministra ba Asuntu ASEAN, Milena Maria da Costa Rangel, ne’ebé estabelese kriasaun grupu traballu interministeriál ida-ne’ebé responsável ba implementasaun rekomendasauns ne’ebé hatuur iha Deklarasaun Prezidénsia ASEAN nian, ne’ebé emite iha Simeira ASEAN ba da-46.

Ida-ne’e, ho objetivu atu konklui prosedimentu formál sira-ne’ebé nesesáriu, nune’e mós aselera negosiasaun sira kona-ba akordu ekonómiku prinsipál sira-ne’ebé nesesáriu ba prosesu adezaun plena Timor-Leste nian ba organizasaun ne’e, ne’ebé tuir planu sei hala’o iha fulan-Outubru 2025.

Jornalista : Hortencio Sanchez

Editór        : Cancio Ximenes