Empreza Baduolilari harii ona poste eletrsidade iha Borubai no Kaisebalata

MUNISÍPIU, VIKEKE

Projetu eletrifikasaun iha Kaisebalata no Borubai, Postu Administrativu Uatulari. Imajen TATOLI/Vitorino Lopez da Costa

VIKEKE, 25 Agostu 2025 (TATOLI)—Empreza Baduolilari harii ona poste eletrisidade ba Burubai, Suku Uaitame, Makadike no Kaisebalata husi Suku Afaloikai, Postu Administrativu Uatulari, Munisípiu Vikeke.

“Kaisebalata poste harii hotu ona. Hela fiu mak seidauk. Enkuantu ba fali área Baborubai nian  mós poste harii  hotu ona. Ne’ebé, ami sei distribui tan materiál sira hanesan fiu no trafo sira dala ida,” Reprezentante Empreza Uaitau Unipessoal, Lda, Vírgio Liu informa ba TATOLI iha Postu Uatulari, Segunda ne’e.

Nia dehan depoizde distribui materiál  sira-ne’e mai hotu, tékniku sira hahú dada fiu no halo instalasaun ba uma-kain sira atu asesu ba enerjia eletrisidade.

“Ita-nia komunidade kuaze tinan barak la asesu ba eletrsidade. Agora mak Governu foin dada eletrisidade ba sira,” nia haktuir.

Notísia relevante: EDTL garante tinan ne’e suku iha territóriu tomak bele asesu eletrisidade

Vírgio informa distánsia Kaisebalata no Borubai hamutuk kilómetru haat ho totál orsamentu ne’ebé gasta ba projetu eletrifikasuan ne’e hamutuk millaun $4.

“Obra sei finalizada iha fulan-Dezembru tinan ne’e hodi entrega ba Eletrisidade de Timor-Leste, Empreza Públika (EDTL, E.P.),” nia hato’o.

Tuir dadus, Kaisebalata iha uma-kain 19 no Borubai uma-kain 20.

Jornalista: Vitorino Lopez da Costa

Editór: Xisto Freitas da Piedade