FFTL deside treinadór husi Portugál substitui Simón Elissetche

DESPORTU, HEADLINE

Diretór Serbisu Selesaun Ekipa Nasionál FFTL, João Manico Amaral. Imajen TATOLI/Natalino Belo

DILI, 25 Agostu 2025 (TATOLI)—Federasaun Futeból Timor-Leste (FFTL) deside treinadór ekipa selesaun nasionál foun husi Portugál hodi substitui Simón Pablo Elissetche.

Diretór Serbisu Selesaun Nasionál FFTL, João Manico Amaral esplika iha tempu badak sei selebra kontratu ho ekipa treinadór husi Portugál tanba konsideradu importante atu eleva prestasaun ba selesaun nasionál tantu U-23, sénior no feminina.

“Ita iha ona kandidatu. Iha tempu badak sei aprezenta ba públiku,” Diretór Serbisu Selesaun Nasionál FFTL hateten iha ninia kna’ar fatin, Bairros dos Grilos, Segunda ne’e.

Notísia relevante: FFTL hakotu kontratu treinadór nasionál Simón Elissetche

Manico relata FFTL seidauk bele fò sai identidade kandidatu treinadór ekipa selesaun nasionál referidu ba públiku maski ekipa treinadór ne’e prezensa ona iha Timor-Leste tanba foin iha faze diskusaun.

“Sei kontinua halo diskusaun ho ekipa treinadór sira husi Juvenil, U-23, feminina no sénior. Tuir planu sei kontratu treinadór foun ho durasaun tinan-ida tanba ita hanoin ona katak hakarak lori futeból Timor-Leste adapta tuir kurríkulu Portugál nian,” nia argumenta.

Entretantu, FFTL hakotu kontratu treinadór sesante, Simón Pablo Elissetche tanba la atinje meta ne’ebé deskreve iha kontratu.

Jornalista: Natalino Belo 

Editór: Xisto Freitas da Piedade