FFTL deside treinadór lokál na’in-haat provizoriamente lidera Selesaun Nasionál U-23

DESPORTU, HEADLINE

Diretór Serbisu Selesaun Nasionál FFTL, João Manico Amaral (liman-loos) akompañadu husi Sekretáriu Jerál FFTL, José Adilson Ribeiro realiza konferénsia imprensa iha Sede FFTL, Kuarta (27/08/2025). Imajen TATOLI/Natalino Belo

DILI, 27 Agostu 2025 (TATOLI)—Federasaun Futeból Timor-Leste deside ekipa treinadór lokál hamutuk na’in-haat provizoriamente lidera ekipa selesaun nasionál hodi partisipa jogu kompetisaun Asian Football Confederation (AFC-sigla ingléza) U-23 qualifiers ne’ebé sei hala’o iha Xina.

Diretór Serbisu Selesaun Nasionál FFTL, João Manico Amaral esplika desizaun referida foti tanba pozisaun treinadór iha selesaun nasionál sei mamuk hafoin Simón Pablo Elissetche termina kontratu ho federasaun iha Segunda, 25 Agustu nary treinadór prinsipál foun, José Pedro Alves Salazar sei efetivu iha inísiu fulan-Setembru.

“Hafoin ita konkorda hakotu treinadór Simón nia kontratu, ita entrega kedas responsabilidade ba ekipa treinadór lokál hodi lidera kompetisaun AFC U-23 qualifiers iha Xina,” Manico hateten iha ninia kna’ar fatin, Sede FFTL, Bairro dos Grilos, Kuarta ne’e.

Notísia  relevante: FFTL ofisialmente selebra kontratu ho treinadór prinsipál husi Portugál

Manico esplika treinadór na’in-haat kompostu husi Ameliano ‘Ari’, Vicente, Julião Monteiro nary Francisco ne’ebé hahú ona halo selesaun nary treinu jogadór sira nune’e sei akompaña selesaun nasionál ne’ebé tuir planu sei aranka bá Xina iha loron-31 Agostu.

Nia salienta bainhira jogu kompetisaun AFC qualifiers ramata, jogadór U-23 sira koloka hamutuk ho ekipa sénior lideradu Treinadór Prinsipál Zé Pedro hodi masimiza liután preparasaun ba kompetisaun AFC Asian Cup 2027 kontra Filipina iha fulan-Outubru tinan ne’e.

“Ita depozita konfiansa ba treinadór temporál sira-ne’e tanba haree ba sira-nia record durante kompetisaun lokál,” Manico informa.

Entretantu, kompetisaun AFC U-23 qualifiers, ekipa selesaun nasionál kolokadu iha grupu D hamutuk ho ekipa Austrália, Xina nary Illa Mariana iha-ne’ebé ekipa Lafaek sei hala’o jogu dahuluk kontra ekipa uma-na’in Xina iha loron-03 Setembru tinan ne’e.

Jornalista: Natalino Belo 

Editór: Xisto Freitas da Piedade