FFTL hakotu kontratu treinadór nasionál Simón Elissetche

DESPORTU, HEADLINE

Treinadór Selesaun Nasionál Timor-Leste, Simón Pablo Elissetche. Imajen espesiál

DILI, 25 Agostu 2025 (TATOLI)—Federasaun Futeból Timor-Leste (FFTL) hakotu kontratu Treinadór Selesaun Nasionál Timor-Leste, Simón Pablo Elissetche tanba konsideradu la atinje meta FFTL.

Diretór Serbisu Selesaun Ekipa Nasionál FFTL, João Manico Amaral esplika desizaun referida foti hafoin FFTL halo evaluasaun ba treinadór Simón ne’ebé rezulta la atinje meta ne’ebé FFTL hakarak hanesan hatudu prestasaun ba ekipa selesaun nasionál liuliu rezultadu jogu durante hala’o iha nivel rejionál.

“Hafoin liuhosi avaliasaun FFTL kona-ba dezempeñu serbisu durante besik tinan ida, ami konkorda hamutuk termina nia kontratu,” Diretór Serbisu Selesaun Nasionál FFTL hateten iha ninia kna’ar fatin, Bairros dos Grilos, Segunda ne’e.

Nia haktuir prestasaun serbisu treinadór ne’e la fó satisfasaun ba públiku liuliu kada torneiu ne’ebé Timor-Leste partisipa hanesan kualifikasaun AFC no AFF ne’e la tuir alvu FFTL no jogu kompetisaun seluk ne’ebé sei hala’o iha metade tinan-2025 nian.

Diretór Serbisu Selesaun Ekipa Nasionál FFTL, João Manico Amaral. Imajen TATOLI/Natalino Belo

“Nia sente todan entaun ami deside hamutuk ninia jornada to’o iha-ne’e,” João Manico akresenta.

Aleinde ne’e, FFTL esforsu halo selesaun ba jogadór timoroan iha diáspora atu masimiza ekipa nasionál Timor-Leste maibé treinadór ne’e la aproveita ho másimu.

Manico informa, tuir kontratu, Simón Elissetche iha meta maibé tanba la atinje nune’e FFTL iha devér atu termina kooperasaun no Federasaun iha devér halo pagamentu saláriu fulan-haat (Setembru to’o Dezembru) tuir kontratu ne’ebé iha.

“Ida-ne’e tuir saida mak hakerek iha kontratu,” Manico argumenta.

FFTL hato’o agradese ba Simón Elissetche ne’ebé dedika aan ona ba ekipa selesaun nasionál Timor-Leste liuhosi esforsu tomak ne’ebé halo durante sai treinadór maski hasoru obstákulu.

Entretantu, Treinadór Simón Elissetche rasik selebra kontratu ho FFTL iha tinan-2024 ne’ebé responsavel ba ekipa selesaun nasionál sénior, U-23 no feminina iha-ne’ebé tuir kontratu sei termina iha Dezembru tinan-2025.

Simón antes ne’e nu’udár treinadór ba ekipa Persikutim Kutai, Indonézia iha tinan-2013 molok kontinua sai treinadór ba ekipa Assalam FC iha tinan-2016 no Karketu Dili FC iha tinan-2017, Lelenok United 2020 no ikus iha PS Siak (Indonézia).

Jornalista: Natalino Belo 

Editór: Xisto Freitas da Piedade