Hametin liña koordenasaun, MESSK – Autoridade RAEOA selebra akordu

3 days ago 4

EDUKASAUN, OEKUSI

Hametin liña koordenasaun, MESSK – Autoridade RAEOA selebra akordu

Ministériu Ensinu Superiór Siénsia no Kultura (MESSK) ho Autoridade Rejiaun Administrativa Espesiál Oekusi Ambeno (RAEOA) selebra MoU, kona-ba kontratu inter-administrativu hodi hametin liña koordenasaun. Imajen TATOLI/Abílio Elo Nini

OEKUSI, 25 Agostu 2025 (TATOLI) – Ministériu Ensinu Superiór Siénsia no Kultura (MESSK) ho Autoridade Rejiaun Administrativa Espesiál Oekusi Ambeno (RAEOA), selebra akordu – Memorandum of Undertanding (MoU), kona-ba kontratu inter-administrativu hodi hametin liña koordenasaun.

Ministru Ensinu Superiór Siénsia no Kultura, José Honórario Jerónimo Martins, esplika, objetivu husi akordu ne’e, atu bele halo serbisu sentrál nian mai iha RAEOA, ba asuntu ensinu superiór inklui programa bolsa estudu nian, aliñadu ho programa Governu nian.

“Tanba saida mak ministériu halo MoU ne’e, tanba ita hakarak lori ukun ne’e besikliu atu serví ita-nia komunidade sira. MESSK ko’alia ba nível universitáriu de’it, maibé Oekusi iha mós universidade rua – DIT no UNPAZ, sira loke paralela iha ne’e, entaun tenke kumpre rekezitu ne’ebé ministériu hasai, karik loke kursu ka ensinu ruma sein koordena ho autoridade RAEOA ne’e labele, tan ne’e mak asina MoU ne’e importante ba koordenasaun,” nia ko’alia iha salaun edukasaun Oekusi.

Objetivu daruak, MESSK mós halo ona teste ba estudante sira-ne’ebé atu asesu ba univesitáriu, entaun ministériu tenke haruka ekipa ida mai Oekusi hamutuk ema na’in-tolu, atu ajuda estudante sira-ne’ebé atu teste tama ba universitáriu, no halo mós sosializasaun ba univesidade sira tantu públiku no privada, ba kursu ne’ebé akreditadu, tanba ministériu enfrenta hela problema, kona-ba kursu barak iha ensinu superiór sira balun laiha akreditadu, maibé simu ona graduasaun.

“Entaun ha’u hanoin MoU ne’e bele ajuda liña koordenasaun ne’ebé di’ak liután entre RAEOA ho MESSK, no ministériu mós hakarak oferese nia tékniku sira hodi ajuda mós Autoridade RAEOA,” nia esplika.

Iha biban ne’e, Prezidente Autoridade RAEOA, Rogério Tiago de Fátima Lobato, konsidera akordu ofisiál ne’e nesesáriu.

“Ksolok bo’ot ba ministériu lori prezente ida mai RAEOA, tan ne’e orgullu ba delegasaun tanba bele mai tulun ami. Durante ne’e ami nakloke ba ema hotu, ita kompara ho administrasaun bainhira tama Oekusi sei husu autorizasaun tanba Oekusi nu’udar rejiaun espesiál, maibé to’o ami, muda situasaun tanba Oekusi nu’udar parte integrante territóriu Timor-Leste,” nia orgullu.

Jornalista: Abílio Elo Nini

Editór: Rafael Ximenes de A. Belo

Read Entire Article