INETL Vikeke rekolla presu nesesidade bázika iha kada semana

MUNISÍPIU, VIKEKE

Xefe Servisu Institutu Nasionál Estatístika Timor-Leste, Institutu Públiku (INETL, I.P.) Munisípiu Vikeke, Maria P. F. Campos. Imajen TATOLI/ Vitorino Lopez da Costa

VIKEKE, 27 Agostu 2025 (TATOLI)—Xefe Servisu Institutu Nasionál Estatístika  Timor-Leste, Institutu Públiku (INETL, I.P.) Munisípiu Vikeke, Maria P. F. Campos hateten INETL kontinua tama-sai merkadu sira iha Munisípiu Vikeke hodi rekolla presu nesesidade bázika iha kada semana.

“Daudaun ne’e ami-nia ekipa kada semana tama-sai loja nary merkadu sira rekolla presu sasán sira-ne’ebé ita-nia negosiante sira fa’an iha loja nary merkadu. Dadus sira-ne’ebé ami rekolla ami sei hato’o ba nasionál hodi halo komparasaun ba presu sasán husi nasionál,” Maria hateten ba jornalista sira iha ninia kna’ar fatin, Sira-Lari, Vikeke, Kuarta ne’e.

Maria observa presu nesesidade hanesan foos kilógrama 25 iha Vikeke $18,50, tanba haree mós distánsia distribuisaun foos husi Dili mai Vikeke.

Notísia relevante: CCI-TL observa folin nesesidade bázika iha kapitál Viqueque normál

Tuir nia katak INETL rekolla de’it presu sasán, maibé atu hatún presu sasán ne’e kompeténsia ministériu relevante.

Iha fatin ketak, Sekretáriu Munisipál Vikeke  ba Asuntu Administrasaun nary Finansa, José da Costa de Sousa haktuir servisu INETL sempre kolabora hamutuk ho Autoridade Munisípiu Vikeke.

“Durante ne’e ha’u haree servisu INETL sempre kolabora ho ami. Bainhira sira bá rekolla dadus ruma iha suku sempre informa ba ami,” nia tenik.

Tuir dadus, funsionáriu servisu INETL, I.P. Munisípiu Vikeke hamutuk na’in-sanulu (10) kompostu husi tékniku rekolla dadus na’in-lima (5), hamoos-na’in iha na’in-ida (1) no seguransa na’in-haat (4).

Jornalista: Vitorino Lopez da Costa

Editór: Xisto Freitas da Piedade