Instalasaun ba semáforu modernu foun iha Dili kuaze konklui

EKONOMIA, HEADLINE

Semáforu iha estrada Timor Plaza nia oin, sesta (14/02). Imajen Tatoli/Francisco Sony

DILI, 25 Agostu 2025 (TATOLI) – PT. Javis Teknologi Albarokah ne’ebé halo instalasaun ba semáforu modernu foun haat iha Dili daudaun atinje ona 97,67%.

Semáforu ne’e instala iha área Timor Plaza nia oin, Palásiu Prezidensiál, Kolmera no Ministériu Justisa nia oin iha Kaikoli.

Jerente PT. Javis Teknologi Albarokah, Hendrit, esplika katak serbisu kona-ba instalasaun semáforu modernu iha fatin haat ativu ona, Closed-circuit television (CCTV) mós monta ona, fatin ka CCTV room mós konklui ona no agora hadi’ak iha laran ne’e para instala ekipamentu teknolojia informátika (IT).

“Tuir planu ita sei entrega ba Governu fulan ne’e, tanba agora hela de’it finaliza CCRoom”, Hendrit dehan ba Tatoli,I ohin.

Iha sorin seluk, Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, esplika katak bainhira empreza entrega ona ba Diresaun Nasionál Transporte Terrestre (DNTT) mak sei halo kontrolu ba semáforu modernu ne’e.

“Ami sei halo monitorizasaun liu husi CCTV ba karreta ka motorizada sira nebe halo infrasaun. Bainhira kontra mak sei multa tuir Lei Kódigu Estrada númeru 6/2003, iha artigu 4 númeru 2 kódigu estrada selu multa hahú husi $9 to’o $45”, Nelson Martins informa.

Lembra katak Ministériu Transporte no Telekomunikasaun (MTK) kontrata, iha 09 Outubru 2024, empreza PT. Javis Teknologi AlBarokah hodi halo instalasaun ba semáforu modern ho montante orsamentu $748.557,28.

Notisía relevante: Semáforu modernu haat iha kapitál hahú funsiona

Jornalista: Arminda Fonseca 

Editora: Maria Auxiliadora