Jogadór Claudio Osório selebra kontratu ho klube Persipal Palu iha Indonézia

DESPORTU

Jogadór selesaun nasionál Claudio Osório ne'ebé selebra ona kontratu ho klube Indonézia Persipal Palu. Imajen/Espesiál.

DILI, 28 Agostu 2025 (TATOLI)—Jogadór selesaun nasionál Timor-Leste, Claudio Osório, ofisialmente selebra ona kontratu ho klube segunda divizaun husi nasaun Indonézia hanaran Persipal Palu ho durasaun fulan-sia (9).

“Ha’u sente kontente tebes atu tama iha Persipal Palu, liga-2 tanba ida-ne’e maka ha’u-nia alvu ida-ne’ebé ha’u tau ba ha’u-nia aan atu joga iha rai-li’ur. Tanba ne’e, ha’u agradese katak oportunidade ida-ne’e to’o ona iha ha’u-nia liman nary ha’u labele hein tan,” Claudio hateten ba Agência TATOLI via WhatsApp, kinta ne’e.

Osório hatutan, oportunidade ne’ebé nia hetan bele kria dalan ba maluk timoroan sira seluk ne’ebé mak destinadu atu joga iha rai-li’ur nary mós atu inspira labarik sira-ne’ebé mak hakarak sai jogadór futeból.

“Ha’u-nia kontratu válidu to’o loron 6 fulan-maiu tinan 2026. Ha’u nia pozisaun atuál agora mak joga ho númeru kamijola 8 ou 10,” nia dehan.

Nu’udar jogadór timoroan Claudio Osório sei hatudu jogu ne’ebé di’ak ho disiplina atu fó vitória ba klube ne’ebé haraik ona kontratu ba nia.

Claudio Osório nia estatutu bainhira ba joga iha klube Indonézia ne’e hanesan jogadór empresta husi Karketu Dili FC. Antes ne’e, iha époka 2025, Claudio reforsa klube Timor nian ho naran istimadu Karketu Dili FC.

Bainhira hamutuk ho Karketu, Claudio joga iha lina klaran ka hanesan mediu ho númeru kamijola 18. Durante ho Karketu, Claudio konsege lori klube kapitál Dili ne’e sai kampiaun Liga Futeból Timor-Leste époka 2025.

Antes hamutuk ho selesaun nasionál, Claudio mós joga ona ba ekipa selesaun nasionál U-16 Inglaterra nian. Claudio sidadaun Timor ne’ebé nia inan-aman hela iha Reinu Unidu nary nia hetan sidadaun Timor-Leste iha tinan 2024.

Koñese Persipal Palu

Asosiasaun Futeból Indonézia (Persipal) Klube Futeból Palu, ho abreviasaun Persipal FC, mak klube futeból Indonézia nian ida-ne’ebé baze iha Estádiu Gawalise iha Palu, Sulawesi Sentrál.

Persipal kompete iha kompetisaun Liga-2 hafoin hetan klube Liga-2 Muba Babel United iha meadu 2022.

Treinadór: Achmad Zulkifli
Na’in: Ronny Tanusaputra
Fatin: Palu, Indonézia
Liga: Kampeonatu
Harii: 1977.

Jornalista : Hortencio Sanchez

Editór       : Cancio Ximenes