MOP husu empreza Salimagu aselera konstrusaun moru protesaun iha Fatisi

EKONOMIA, AILEU

Ministru Obra Públika, Samuel Marçal. Imajen /TATOLI

DILI, 27 Agostu 2025 (TATOLI)—Ministru Obra Públika (MOP), Samuel Marçal, husu kompañia Salimagu Unipesoál, Lda, ne’ebé manán konkursu públiku atu aselera projetu konstrusaun moru protesaun ba estrada iha suku Fatisi, postu administrativu Laulara, munisípiu Aileu.

“Projetu ne’e ha’u mós hirus sira, tanba ezekusaun ne’e kle’ur duni. Tanba, agora atu besik udan ona ne’e mak ha’u bolu sira haka’as an hodi aselera lalais. Ita espera, antes udan, bele finaliza ona,” Governante ne’e hateten ba jornalista sira iha Palásiu Governu, kuarta ne’e.

Ministru haktuir, tuir kontratu ne’e iha tenke finaliza iha tinan ida-ne’e nia laran maibé depende haree konstrusaun ne’e falta uitoan de’it ona, presiza aumenta tempu deit nia bele finaliza lalais tamba bainhira konstrusaun ne’e mak la konlui iha tempu bailoro, mak tempu udan mai ne’e aat liután.

“Problema ida mak servisu husi rai-lolon sa’e mai estrada ne’e la fasíl. Maibé, fasilidade empreza mós sai difikuldade, maibé problema sira-ne’e hotu la’ós iha nee de’it, problema sira-ne’e akontese iha fatin-fatin. Ita-nia setór privadu nary nasionál sira dalaruma kuaze barak hakarak de’it kaer projetu, maibé to’o hetan tiha oportunidade ladun esforsu, Kompañia sira balun mak haka’as-an tebes, ida-ne’e realidade,” nia dehan.

Nune’e, Ministéria Obra Públika iha ninia polítika sei esforsu hodi haka’as kompañia sira bele finaliza lalais antes udan mai.

Enkuantu projetu konstrusaun moru protesaun ba estrada ne’e aloka orsamentu hamutuk $585,821.87.

Jornalista : Alexandra da Costa

Editór       : Cancio Ximenes