Promosaun ba juis sei akontese hafoin ferias judisiál

JUSTISA, HEADLINE

Prezidente Tribunál Rekursu, Afonso Carmona. Foto TATOLI/ António Daciparu

DILI, 25 Agostu 2025 (TATOLI)-Prezidente Tribunál Rekursu, Afonso Carmona, hateten promosaun ba juis sira husi dezembargadór ba konselleiru, segunda klase ba primeira klase no direitu ba segunda klase sei akontese hafoin ferias judisiária.

“Ko’alia kona-ba preparasaun Supremu Tribunál ninian, agora ita-hahú halo identifikasaun ba númeru ema ne’ebé atu tuur iha Supremu Tribunál Justisa. Juis sira ne’ebé mak sei tuur iha Supremu Tribunál Justisa ne’e juis sira ne’ebé ita hanaran juis konselleiru na’in-haat nu’udar juis karreira, ne’e tuir lei. Juis sira ne’ebé atu tuur iha ne’ebá juis na’in-hitu”, Afonso Carmona hateten ba jornalista sira iha Ministériu Finansa, foin lalais ne’e.

Nia esplika, juis sira ne’ebé tuur iha Tribunál Rekursu hanaran juis dezembargadór kompostu husi juis na’in-sia. “Ita hahú identifika ona, agora ita hahú foti ona sira nia kurikulum vitae, tanba agora tribunál iha feriadu judisiáriu, entaun hafoin feriadu sei halo desizaun juis hira mak atu halo promosaun”.

Nia dehan, prosesu sira hanesan ne’e la’ós hatudu malu maibé liuhusi prosesu selesaun ne’ebé rigór. “Prosesu sira hanesan ne’e lá’os liuhusi buat ne’ebé hatudu malu, maibé liuhusi prosesu ne’ebé rigorozu”.

Carmona hatutan, hanesan Prezidente Tribunál Rekursu la fiksa juis nain hira mak selesiona ba juis konselleiru, juis dezembargadór, juis segunda klase, tanba buat hothotu konsellu mak sei halo.

“Ha’u labele to’o iha ne’ebá, tanba konsellu mak deside. Entaun ita identifika de’it, no dia 27 Agostu agora ami sei halo reuniaun inisiál kona-ba ida-ne’e”, katak nia.

Nia haktuir reuniaun ne’e sei ko’alia konaba Konsellu Superiór Majistrarura Judisiária nian servisu ne’ebé foku liu ba selesaun ba juis sira, inklui funsionamentu servisu tribunál nian, tanba konsellu mak deside funsionamentu tribunál nian.

Notísia relevante: Konsellu Superiór Majistradu Judisiál hahú diskute promosaun ba juis sira

Jornalista       : Natalino Costa

Editora           : Rita Almeida