SEKoop oferese formasaun ba GHF Uatulari

EDUKASAUN, MUNISÍPIU, VIKEKE

SEKoop Vikeke oferese formasaun bázika kona-ba harii koopertiva nian ba membru Grupu Hakbiit Família (GHF). Imajen TATOLI/Vitorino Lopez da Costa

VIKEKE, 25 Agostu 2025 (TATOLI)—Koordenadór  Sekretariu Estadu Kooperativa (SEKoop) Munisípiu Vikeke, Albino da Costa Guterres informa ekipa SEKoop Vikeke oferese formasaun bázika kona-ba harii koopertiva nian ba membru Grupu Hakbiit Família (GHF), iha Aldeia Makadike, Suku Uaitame, Postu Administrativu Uatulari, Munisípiu Vikeke.

“Ami oferese matéria bázika kona-ba Harii kooperativa nian ba membru Grupu Hakbiit Família, atu membru sira bele iha koñesimentu harii kooperativa iha Postu Uatulari. Tanba ne’e, matéria sira-ne’e hanesan báziku hodi membru grupu sira hanoin harii  kooperativa,” Albino da Costa Guterres ba TATOLI iha Postu Uatulari, Segunda ne’e.

Koordenadór ne’e hatutan matéria bázika ne’ebé formadór SEKoop oferese ba GHF mak hanesan istória kooperativa, akuntabilidade, halo relatóriu, forma asembleia jerál no hili estrutura kooperativa.

“Iha formasaun ikus ami konsege lidera meza no harii ona Grupu Hakbiit Família sai Kooperativa Multisetorál Hakbiit Família (C-MHF) iha Postu Uatulari. Nune’e, bá-oin, ami sei kontinua akompaña sira no oferese formasaun espesialidade ba sira atu sira iha koñesimentu hodi jere kooperativa la’o bá-oin,” nia hato’o.

Notísia relevante: SEkoop rejista kooperativa 20 iha Vikeke

Nia lembra fali katak, uluk Koperativa  CHAMAU mak eziste iha Uatulari, maibé agora kooperativa ne’e pasiva ona.

Iha fatin hanesan, Konsilleiru Kooperativa C-MHF, João Pinto hato’o agradese ba ekipa SEKoop tanba fasilita ona Grupu GHF hodi oferese formasaun no transforma ona GHF ba Kooperativa Multisetorál Hakbiit Família (C-MHF).

“Tanba ne’e, ha’u ha’u husu membru C-MHF tenke fiar aan, rona malu no labele fiar ema seluk. Bainhira ita fiar ema seluk, ita-nia kooperativa sei la la’o bá-oin. Durante ne’e, grupu la’o besik tinan rua halo atividade ortikultura no rai osan. Agora mak SEKoop fasilita ita transforma ba kooperativa. Maski ami hasoru dezafiu oinoin, maibé ami sei kontinua avansa ami-nia kooperativa,” nia hato’o.

Maski harii ona C-MHF maibé nia dehan sei enfrenta ba sasán ATK sira no fasilidade komputadór no makína impreme sira hodi  fasilita servisu C-MHF.

Tuir dadus, Kooperativa C-MHF totál  membru hamutuk na’in-28 kompostu husi mane na’in-17 no feto na’in-11.

Jornalista: Vitorino Lopez da Costa

Editór: Xisto Freitas da Piedade