Sentru Saúde Formosa klarifika estoke vasina anti Raiva sufisiente

SAÚDE

Ilustrasaun vasina raiva. Imajen/Espesiál

DILI, 25 Agostu 2025 (TATOLI)—Xefe Sentru Saúde Formosa, Teresa da Silva Pinto, klarifika públiku nia preokupasaun iha rede sosiál kona-ba vasina antí Raiva iha iha Sentru Saúde Fprmosa estoke laiha ne’e la loos, tanba estoke vasina anti Raiva sufisiente hela.

“Atu klarifika de’it katak ami-nia fatin sentru saúde Formosa loke oras 24 nia laran. Ami-nia estoke vasina anti Raiva sufisiente. Maibé, públiku nia preokupasaun iga rede sosiál katak sábadu semana kotuk pasiente ida asu tata maibé ba sentru saúde Formosa odamatan taka, entaun husi ida-ne’e ha’u mós hakfodak, tanba sábadu ne’e ha’u mós iha ne’e maibé pasiente ida la mai atu vasina anti Raiva,” Teresa da Silva Pinto hateten ba jornalista sira iha nia kna’ar fatin, Sentru Saúde Formosa, ohin.

Durante ne’e, nia dehan, nia orienta responsável Raiva sira katak banhira pasiente ne’ebé mak mai asu tata iha emerjénsia, tenke tau iha WhatsApp group atu ekipa sira halo vasina.

“Tanba ne’e mak iha públiku balun kestiona kona-ba vaisna anti Raiva ne’e ha’u hakfodak, tanba ami-nia estoke vasina iha. Depois, ha’u mos ba haree iha kadernu rejistu, maibé iha ne’eba,  sábadu no domingo, asu tata pasiente laiha maibé la hatene sira ida kestiona ami iha mídia sosiál nee mai husi ne’ebe,” nia hateten.

Nia esplika, daudaun ne’e estoke vasina anti Raiva sufisiente hela atu atende ba pasiente sira-ne’ebé mak asu tata.

“Ami-nia vasina daudaun ne’e estoke sufisiente atu halo atendementu ba ema-ne’ebé mak asu tata,” nia dehan.

Tanba ne’e, nia husu ba populasaun sira hotu liuliu ba iha postu administrativu Na’in Feto nian  katak, labele fiar boatus ne’ebé mak iha mídia sosiál kona-ba estoke vasina antí Raiva ninia estoke iha sentru saúde Formosa ne’e mamuk.

Asu tata atu loron ka kalan, pesoáls aúde iha sentru saúde Formosa nafatin atende pasiente sira iha oras 24 nia laran, tanba ne’e hakbesik mai sentru saúde mo pesoáls aúde sira sei atende ita-boot sira ho maneira atendementu ne’ebé mak iha.

Jornalista : Felicidade Ximenes

Editór        : Cancio Ximenes