SNAEM apoiu pesoál saúde 28-ambulánsia tolu atende atividade krús joven internaisonál

SAÚDE

Arsebispu Arkidioseze Metropolitana Dili, Dom Virgílio Kardeál do Carmo da Silva, SDB no Komite Nasionál Joventude Katólika Timor-Leste inklui sarani katólika sira simu Krúz Joven Internasionál, iha Aeroportu Internasionál Prezidente Nicolau Lobato, sábadu (23/08). Imajen Tatoli/Francisco Sony

DILI, 25 Agostu 2025 (TATOLI)–Serbisu Nasionál Ambulánsia no Emerjénsia Médika (SNAEM) apoiu pesoál saude hamutuk 28 no ambulansia tolu hodi halo atendimentu ba atividade krús joven internaisonál ne’ebé vizita Timor-Leste durante semana ida-nia laran.

“Molok krús joven ne’e to’o iha ita-nia rain, Komisaun Nasionál ba Katótiku Timor-Leste hasoru malu ho Vise-Ministru Ospitál, Flávio Brandão no ha’u rasik hodi prepara ita-nia pesoál saúde no ambulánsia ba eventu ne’e. Husi ne’e, ita prepara pesoál saúde hamutuk 28 inklui kareta ambulánsia tolu,” Diretór Jeral SNAEM, Simplício Amaral de Deus, hateten ba jornalista sira iha Kaikoli, ohin.

Nia relata, sira koloka ambulánsia tolu no profisionál saúde na’in-28, inklui médiku na’in ualu (8) no enfermeiru na’in-20.

“Ita-nia médiku sira-ne’ebé destakadu iha Dili ne’e hamutuk 24 no ita mós estasaun médiku nian  tolu (3). Ida iha estasaun igreja katedrál iha ne’eba mediku rua (2) no enfermeiru neen (6), Igreja Ai-Mutin mediku rua (2) no enfermeiru neen (6) no iha eskola São Pedro Comoro iha mediku rua (2) no enfermeiru neen (6), maibé apoiu mós voluntáriu enfermeiru CJTL nian,” nia relata.

Nia dehan, pesoál saúde na’in-haat (4) no ambulánsia ida (1) akompaña Cruz Joven Internasionál viajen ba munisípiu Bobonaru.

Jornalista : Felicidade Ximenes

Editór       : Cancio Ximenes