STAE Vikeke halo atendimentu movel ba kartaun eleitorál biométriku

MUNISÍPIU, VIKEKE

Diretór Sekretariadu Téknika Administrasaun Eleitorál (STAE) Munisípiu Vikeke, Humberto Fernandes. Imajen TATOLI/ Vitorino Lopez da Costa

VIKEKE, 26 Agostu 2025 (TATOLI)—Diretór Sekretariadu Téknika Administrasaun Eleitorál  (STAE) Munisípiu Vikeke, Humberto Fernandes informa STAE Munisípiu Vikeke halo atendimentu movel ba kartaun eleitorál biométriku.

“Ami implementa ona atendimentu movel ba postu haat. Iha Setembru mai ne’e ami kontinua implementa atendimentu movel,” Humberto ba TATOLI iha ninia kna’ar fatin, Postu Administrativu Vikeke Vila, Tersa ne’e.

Nia haktuir katak atendimentu movel ne’e hala’o iha postu administrativu haat kompostu husi Lakluta eleitór hamutuk 563,  Postu Ossu 624, Uatukarbau 631 nary Uatulari hamutuk 926.

Notísia relevante: STAE Viqueque prodús ona kartaun eleitorál biométriku 527

Diretór STAE Munisípiu  Vikeke informa katak atendimentu referidu hahú  iha fulan-Jullu liubá, iha-ne’ebé kada postu sei hala’o durante loron-lima.

“Husi atendimentu movel ne’e ami konsege prodús kartaun biométriku hamutuk 2.744. Maibé, eleitór sira-nia kartaun ami seidauk distribui tanba presiza hetan aprovasaun husi STAE nasionál nary prosesu biométriku ne’e ita hetan tiha aprovasaun mak ami foin emprime. Daudau ne’e ami foin emprime Postu Lakluta nian. Hafoin tékniku sira emprime hotu ami sei distribui ba xefe suku nary administradór postu sira mak distribui tutan ba eleitór sira,” nia subliña.

Jornalista: Vitorino Lopez da Costa

Editór: Xisto Freitas da Piedade